,,Ég er í einu besta starfi í heimi,“ segir Heimir Hallgrímsson, landsliðsþjálfari Íslands í ítarlegu viðtali við Guardian á Englandi.

Heimir ræddi við blaðið á dögunum, nú í aðdraganda Heimsmeistaramótsins. Ekki er þó víst að Heimir haldi áfram í þessu góða starfi.

Hann hefur nefnilega ákveðið að skoða mál sín eftir að Heimsmeistaramótinu í Rússlandi lýkur, samningur hans er þá á enda við KSÍ. Möguleiki er á spennandi tilboð komi frá stóru félagsliði eða landsliði.

,,Ég sagði bara KSÍ að ég vildi sjá hvaða möguleikar verða,“ sagði Heimir og segir að ákvörðunin sé svolítið eigingjörn.

,,Þetta er pínu eigingjarnt af mér en ég er ekki nafn eins og Eiður Smári. Ég var þjálfari hjá áhugamannaliði. Ef ég nota ekki tækifærið þá kemur þá kannski aldrei aftur, ég veit samt ekki hvað ég geri.“

,,Ég vil hins vegar sjá hvort það komi tækifæri til að gera eitthvað annað.“