Gunnar Lárus Hjálmarsson, betur þekktur sem Dr. Gunni, segir að það skipti miklu máli að kjósa rétt. Það hafi ítrekað sannast á undanförnum árum.

Í pistli á bloggsíðu sinni gerir hann þetta að umtalsefni og vísar til Eurovision-söngvakeppninnar máli sínu til stuðnings. Þar hafi Íslendingar ítrekað gert mistök.

Pappír Svölu fór síðast. Pottþétt lag og fumlaus flutningur alvöru poppsöngkonu. Ísland elskar Svölu sína, en Evrópa tengdi bara ekkert við þetta. Um hvað var verið að syngja? Pappír? Skrifstofuvörur í Eurovision – það er ekkert sexí við það, engin skýrskotun við evrópskt sálarlíf. Svala hefði alveg eins getað sungið „Heftari“ eða „Skrifborð“. Lagið í öðru sæti hefði líklega gert betri hluti. Daði Freyr og brosandi krakkarnir hefðu verið á skjön við meginstrauma söngvakeppninnar – svona eins of Portúgalinn sem vann. Íslenskir kjósendur voru bara of ferkantaðir pappakassar til að fatta þetta. Það er alltaf sama sagan,“ segir Dr. Gunni.

Hann segir að þetta „heilkenni“ kjósenda hafi keyrt um þverbak 2015 þegar María Ólafsdóttir flutti framlag Íslands í Eurovision. „…en eftir sat Friðrik Dór með lag sem hefur orðið einn stærsti smellur síðustu ára – Í síðasta skipti – og er sungið af börnum og gamalmennum um allt land, á meðan enginn man eftir Maríu og laginu hennar sem datt strax úr forkeppninni.

Ísland hefur ekki komist upp úr forkeppni Eurovision þrjú ár í röð. Sjáum til hvernig gengur næst, en þetta er auðvitað óviðunandi ástand. Á laugardaginn á að kjósa til alþingis í fjórða skipti síðan eftir bankahrun. Það eru flestir komnir með æluna í hálsinn út af þessu eilífa áreiti af stjórnmálamönnum, en fólk verður að þola þetta lýðræði og mæta á kjörstað og kjósa lag sem verður sungið í fjögur ár, en ekki bara í nokkra mánuði,“ segir Gunnar sem segir síðan frá því hvaða flokk hann ætlar að kjósa.