Sumt er ekki til þess fallið að birta á Facebook og þar með deila með umheiminum. Aðallega út af því að þetta fer í taugarnar á sumum og lítur einfaldlega út fyrir að vera mont og ekkert annað. En samt sem áður birta margir ýmislegt á Facebook sem er til þess fallið að ergja Facebookvinina mikið.
Hér verða nefnd til sögunnar nokkur atriði sem ætti aldrei að birta á Facebook.
1. Hógvært mont. Hér er átt við það þegar monti er pakkað inn í hægversku en margir telja að þetta sé eitt það alversta sem birt er á Facebook. Þetta geta verið „nýjar“ fréttir úr vinnunni þar sem viðkomandi hrósar sjálfum sér og eigin frama. Nú þá er auðvitað algjörlega óþolandi þegar fólk montar sig af frábærum árangri á prófi þrátt fyrir að hafa „varla lesið stafkrók fyrir prófið“.
2. Ekki stæra þig af hversu marga Facebookvini þú átt. Fólk er fyrir löngu farið að kunna svo vel á Facebook að það vekur ekki lengur aðdáun þess að einhver eigi 900 „vini“ á Facebook. Allir vita að enginn á 900 vini, í besta falli er hér um kunningja að ræða. Þá má spyrja af hverju á þá að vera „vinur“ þeirra á Facebook? Þetta er eiginlega bara eins og aumkunarverður eltingarleikur við vinsældir. Þess vegna er góð hugmynd að taka til á vinalistanum. Góð regla er að ef þú myndir ekki heilsa viðkomandi „vini“ á götu úti þá er engin ástæða til að vera vinur hans á Facebook.
3. Fyllerísmyndir. Það er kannski í lagi að slíkar myndir birtist á meðan fólk er ungt að árum, er jafnvel í námi og stunda skemmtanalífið. En þegar fólk er orðið aðeins eldra og lífið kannski aðeins alvarlegra er ekki gott að birta slíkar myndir. Facebookvinum þínum er nefnilega alveg sama hversu full/ur þú varst um síðustu helgi og þetta getur eiginlega bara orðið vandræðalegt með endurteknum myndbirtingum.
4. Afbrot. Þetta er auðvitað svo augljóst en við nefnum þetta nú samt sem áður. Þú ættir aldrei að birta myndir eða færslur á Facebook sem snúast um ólöglegt athæfi sem þú hefur tekið þátt í. Fyrst og fremst af því að um ólöglegt athæfi er að ræða en það er einnig bara helber heimska að skrifa um hvernig þér tókst að koma nýja bílnum í 220 km/klst eða hvernig þú „barðir“ vitið í einhvern vitleysing um síðustu helgi.
5. Börnin þín. Það er í lagi að birta myndir af börnum á Facebook svo lengi sem það eru ekki óviðeigandi myndir. Það hafa ekki allir áhuga á að sjá börnin þín þakin eigin saur eftir „smá óhapp“ á skiptiborðinu eða útötuð í mat þegar þau eru að læra að borða sjálf.
6. Megrunin þín. Það er kannski mikil hvatning fyrir þig að deila því með öllum öðrum hversu vel þér gengur að léttast. En hugsaðu þig aðeins um áður en þú deilir slíku. Sumir skrifa að þeir hafi lést um 1,5 kíló í vikinnu og hafi bara lifað á soðnum kjúklingi og baunum. En hvað ef eitthvað klikkar í þessu, hvernig ætlar þú þá að útskýra það?
7. Myndir úr fríinu. Það er ekki leiðinlegt að gleðjast yfir góðu sumarfríi annarra þegar nokkrar myndir eru birtar á Facebook en þegar þetta verður albúm með 300 myndum er þetta frekar orðið mont en að segja vinum þínum að þú sért að njóta þess að vera í fríi. Ef þú ert með opin Facebookaðgang er þess utan ekki skynsamlegt að segja frá því að þú sért í fríi, það auðveldar innbrotsþjófum störf sín til muna.
8. Góðverkin þín. Það er ákveðin jafnvægislist að segja frá góðverkum þínum. Ef þú skrifar á Facebook að þú hafir gefið blóð eða gefið 5.000 krónur í landssöfnun til styrktar góðu málefni þá er hætt við að margir telji það vera mont þrátt fyrir að um góðverk hafi verið að ræða. Ef þú hvetur aðra til að gera það sama og þú getur það farið illa í marga. Það er því kannski rétt að halda aftur af birtingu slíkra „frétta“.
