Oddný G. Harðardóttir þingmaður Samfylkingarinnar og fyrrverandi fjármálaráðherra hefur óskað eftir því að fjárlaganefnd fái upplýsingar um þjónustusamning Sjúkratrygginga Íslands við Klíníkina í Ármúla. Í dag greindi Morgunblaðið frá því að Klíníkin í Ármúla hyggst bjóða upp á fimm daga legudeild fyrir sjúklinga sem fara þar í aðgerðir. Fram að þessu hafa aðgerðir á vegum einkaaðila hér á landi verið þess eðlis að hægt sé að fara heim samdægurs, en nú hyggst Klíníkin bjóða upp á stærri aðgerðir sem krefjast þess að sjúklingar dvelji þar í allt að fimm daga.

Líkt og Eyjan greindi frá í dag vill Elsa Lára Arnardóttir þingmaður Framsóknarflokksins fund í velferðarnefnd Alþingis um málið við fyrsta tækifæri. Oddný segir á Fésbókarsíðu sinni að hún óski eftir því að fjárlaganefnd fái upplýsingar um þjónustusamning Sjúkratrygginga Íslands við Klíníkina í Ármúla þar sem kemur fram hvaða upphæðir greiðast úr ríkissjóði fyrir þjónustuna og hvaða markmið eru í samningnum um þá þjónustu sem veita skal og hvaða leiðir eigi að fara til að ná þeim markmiðum:

Hvaða mælikvarðar eru notaðir til að meta árangur þjónustunnar og með hvaða hætti árangurinn og kostnaðurinn er borinn saman við sambærilega sjúkrahúsþjónustu sem ríkissjóður rekur sjálfur.
Hver er launagreiðandinn og upplýsingar um hvort starfsfólk greiðir iðgjald til LSR og hugsanlegar skuldbindingar sem geti fallið á ríkissjóð vegna launa starfsfólks.

Einnig eigi að koma fram hver kostnaðarábyrgð og fagleg ábyrgð Klíníkarinnar sé ef svo illa færi að sjúklingur þyrfti að leggjast inn á ríkisrekið sjúkrahús að lokinni meðferð. Vill Oddný fá upplýsingar um hvernig faglegu eftirliti með starfseminni verði háttað sem og hvaða reglur gildi um framhaldsmeðferð og skyldur einkasjúkrahússins varðandi hana.

Ari Brynjólfsson – ari@pressan.is