Elsa Lára Arnardóttir þingmaður Framsóknarflokksins hefur óskað eftir því að fundur verði haldinn sem fyrst í velferðarnefnd Alþingis vegna frétta að landlæknir hefur veitt Klíníkinni í Ármúla leyfi til að reka legudeild. Greint var frá málinu í Morgunblaðinu í dag, en þar kom fram í Klíníkin hafi fengið leyfi fyrst einkafyrirtækja hér á landi til að reka legudeild til að hægt sé að framkvæma stærri aðgerðir þar sem sjúklingar geta ekki farið heim samdægurs.

Haft var eftir Hjálmari Þorsteinssyni bæklunarlækni og framkvæmdastjóri Klíníkinnar í Ármúla að legudeildin geti hjálpað til við að stytta biðlista eftir stærri aðgerðum:

Við lítum á okkur sem sjúkrahúseiningu, sem er samstarfsaðili til þess að halda biðlistum í lágmarki, hvor sem það eru bæklunaraðgerðir, kvensjúkdómaaðgerðir eða brjóstaminnkanir svo ég nefni dæmi um aðgerðir þar sem langur biðlisti er eftir aðgerðinni,

Elsa Lára hefur beðið um að heilbrigðisráðherra, landlæknir, forstjóri Landspítalans og forsvarsmenn Klíníkinnar mæti á fundinn. Segir hún á Fésbókarsíðu sinni að ýmsar spurningar vakni, þar á meðal hvort gerðir verði sambærilegir samningar við opinberu heilbrigðisstofnanirnar og sjúkrahúsin til að stytta biðlista eftir skurðaðgerðum:

En nú þegar erum við með auð rými á heilbrigðisstofnunum á landsbyggðinni. Má þar m.a. nefna Akranes, Selfoss og Reykjanesbæ.

Hvernig verður aðgangi fólks að þjónustunni háttað, getur fólk borgað sig fram yfir biðlista í hinu opinbera kerfi?

Mun þetta hafa áhrif á fjármagn til hinna opinberu stofnanna, heilbrigðisstofnana og sjúkrahúsa?,

spyr Elsa Lára. Vonar hún að fundurinn verði haldinn sem fyrst og að á hann mæti Óttarr Proppé heilbrigðisráðherra, Páll Matthíasson forstjóri LSH, Birgir Jakobsson landlæknir og forsvarsmenn Klíníkurinnar í Ármúla.

Ari Brynjólfsson – ari@pressan.is