Deilur innan forystu Pírata um hvort borgin eigi að rifta samningum við Ólaf Ólafsson halda áfram og segir borgarfulltrúi flokksins að orð þingmanns jafngildi vantraustyfirlýsingu. Líkt og fram hefur komið eru skiptar skoðanir innan Pírata um hvor Reykjavíkurborg eigi að rifta samningum við Ólaf í kjölfar birtingu skýrslu rannsóknarnefndar Alþingis sem komst að þeirri niðurstöðu að hann hefði blekkt almenning og stjórnmálamenn við kaupin á Búnaðarbankanum. Sagði Þór Saari, sem var í framboði fyrir flokkinn í síðustu kosningum, að borgin ætti að rifta samningum við Ólaf og að Píratar ættu að slíta meirihlutasamstarfinu ef það yrði ekki gert. Undir það tók Sara Óskarsson þingmaður Pírata.

Halldór Auðar Svansson borgarfulltrúi sagði að ábyrgðin lægi ekki hjá meirihlutanum því allir borgarfulltrúar hefðu samþykkt samningana. Í Silfrinu í gær sagði Dagur B. Eggertsson borgarstjóri að lögfræðingar borgarinnar hefðu komist að þeirri niðurstöðu að ekki væri hægt að rifta samningunum við Ólaf út frá jafnræðisreglu. Umræða um þetta skapaðist á Fésbókarsíðu Svans Kristjánssonar prófessors í stjórnmálafræði við Háskóla Íslands. Þar ítrekaði Sara sína skoðun:

Það er hægt að rifta svona samningi, smá handavinna, en vel hægt. Þetta er ekki rétt hjá honum.

Svanur sagði málflutning Söru óboðlegan þingmanni og spurði hana hvort hún hefði komið þessu áliti til skila til borgarfulltrúa flokksins. Þá sagði Halldór Auðar:

Ég lít á svona opinbera yfirlýsingu sem vantraustyfirlýsingu í minn garð sem fulltrúa Pírata í borgarstjórn.

Ef flokksfélagi býr yfir einhverjum ráðleggingum sem gætu mögulega gagnast í málinu (þó þær gangi reyndar algjörlega þvert á álit lagasérfræðinga borgarinnar) er rétta leiðin að koma þeim til viðreigandi fulltrúa flokksins. Ekki ýja að þeim á Facebook. Hverjum á það að gagnast?