„Við drukkum alveg yndislegt kaffi og svo spjölluðum við um heima og geima og hið pólitíska landslag,“ sagði Inga Sæland formaður Flokks Fólksins að loknum fundi sínum með Guðna Th. Jóhannessyni, forseta Íslands, í dag. Hún segir augljóst að Bjarni Benediktsson eða Sigmundur Davíð Gunnlaugsson eigi að fá umboð til stjórnarmyndunar en kannast ekki við að Flokkur Fólksins sé kominn í bandalag við Miðflokkinn.

Tilfinningaþrungin ræða Ingu í leiðtogaumræðunum á RÚV á föstudagskvöld vakti mikið umtal. Á blaðamannafundi í dag sem sýnt var frá á vef RÚV kvaðst Inga telja farsællegast að geta bundið saman í stjórn þá flokka sem eru á sambærilegri leið. Draumaríkisstjórnin að mati Ingu er sú sem vinnur fyrir fólkið í landinu.

„Ég sagði það fyrir kosningar að okkur hugnast samstarf við þá sem vilja stefna að þeim markmiðum sem við settum okkur fyrir kosningar.“

Inga sagði jafnframt að flokkur hennar væri reiðubúinn til að starfa í ríkisstjórn sem og í öflugri stjórnarandstöðu og þá kæmi einnig til greina að starfa með fráfarandi stjórnarandstöðunni í ríkisstjórn. Á öðrum stað benti hún á að venjan væri sú að stærsti flokkurinn eða sigurvegari kosninganna fengi stjórnarmyndunarumboðið.

Sem fyrr segir kannast Inga ekki við bandalag Flokks fólksins og Miðflokksins í stjórnarmyndunarviðræðum og kvaðst einungis hafa spjallað stuttlega við Sigmund Davíð í dag auk þess sem hún fékk far heim með bílstjóra hans.

„En við erum afskaplega lík um margt í okkar málefnastefnu þannig að eðli málsins samkvæmt tölum við saman.“