Við erum öll með á nótum þegar spurt er í hvaða málaflokkum umbætur eru næstar og brýnastar í samfélaginu, bæði á landinu öllu og Suður- og Suðausturlandi. Menn nefna t.d. án mikillar umhugsunar: Heilbrigðismál, kjör aldraðra og öryrkja, húsnæðismál, samgöngur og úrbætur í menntamálum. Fleira kemur til í máli manna svo sem umhverfis- og loftslagsmál, helstu atvinnugreinar og stjórnarskráin. Í sérstöðu eru málefni sauðfjárbúa. Þar verður að leita samstarfs við forystu bænda og sláturleyfishafa um lausn á bráðavanda í sauðfjárræktinni og ræða framtíðarstefnu greinarinnar. Við í VG stöndum að baki íbúum í bæjum og til sveita í byggðamálum.
Ólík hugmyndafræði
Þegar rætt er um hvernig skuli standa að umbótum í því góðæri, sem hefur smám saman orðið að veruleika eftir efnahagshrunið, eru ólíkar lausnir á lofti. Einnig hvar og hvernig finna skuli fjármagna þær. Pólitík er að stórum hluta grunduð á ólíkri afstöðu okkar til þess hvernig samfélagið á að þróast. Við byggjum afstöðuna á lífsviðhorfum og hugmyndafræði. Nú hafa orðið til fleiri stjórnmálahreyfingar á Íslandi en nokkru sinni. Það tel ég stafa af uppbroti í samfélaginu við efnahagshrunið. Alþjóðleg efnahagsmál, opnun milli landa, afdrifarík hlýnun, ófriður víða og óöryggi fólks koma líka við sögu, þrátt fyrir aukna velmegun að meðaltali hér heima – sem um leið einkennist af vaxandi ójöfnuði og óþoli. Fátækt er staðreynd á Íslandi.
Sumir eru vel aflögu færir – aðrir ekki
Vinstri hreyfingin – grænt framboð boðar umbætur til næstu fjögurra ára og svarar þannig ákalli mikils meirihluta þjóðarinnar. Við teljum gerlegt að mynda félagshyggjustjórn sem fetar aðrar og betri leiðir en tvær síðustu ríkisstjórnir. Lykilatriði er að afla ríki og sveitarfélögum tekna hjá þeim sem sannarlega eru aflögu færir, hlífa öðrum þegnum, færa fjármuni til þeirra og líka til margvíslegra umbóta sem kallað er eftir en ekki stóð til að framkvæma samkvæmt fjármálastefnu síðustu ára. Um 10% landsmanna eiga yfir tvo þriðju hluta allra eigna í landinu og um 20 þúsund einstaklingar þéna yfir 330 milljarða króna á ári. Bankar og stór fyrirtæki eru flest afar vel haldin. Með skatta- og gjaldajöfnunarstefnu verður hægt að færa til fjármuni innan ríkistekna en hlífa um leið almenningi við álögum. Það er réttlætismál.
Umbætur næstu fjögur ár útheimta þor, yfirvegun, sanngirni og stöðugleika. Um leið má bæta eitt og annað í ríkisrekstrinum. VG er í stakk búið til að leiða nauðsynlega vinnu til úrbóta undir traustri forystu Katrínar Jakobsdóttur, í samvinnu við þá sem ná saman um samfélagslegar lausnir í áföngum.
Höfundur greinar: Ari Trausti Guðmundsson. Höfundur er í 1. sæti á lista VG í Suðurkjördæmi.
