Inga Sæland þvertekur fyrir að vera komin í bandalag með Miðflokki Sigmundar Davíðs Gunnlaugssonar þrátt fyrir að hafa mætt með honum á Bessastaði á mánudag. Þá segist Inga vera vinstrisinnuð og að líkur séu á sex flokka ríkisstjórn. Vísir hefur sagt að það hafi verið slegið út af borðinu en Inga er á öðru máli. Í samtali við mbl.is um samskipti hennar og Sigmundar segir Inga henni hafi þótt það fyndið að þiggja far með honum, en líkt og hefur komið fram áttu þau fund stuttu áður og bauðst Sigmundur Davíð til að skutla henni.

„Við áttum tíu mínútna spjall og maðurinn var elskulegur og bauð mér bílstjórann sinn því hann veit að ég er ekki með bílpróf. Ég hefði annars þurft að hringja á leigubíl. Mér fannst þetta bara fyndið. Ég hef enga heimild til að hitta einhvern mann og gera við hann bandalag án þess að ræða við þingflokkinn. Ég er hins vegar svolítið hrekkjótt og fannst þetta lúmskt galið,“ segir Inga.

Hún segir enn fremur að henni lítist vel á sex flokka stjórn allra flokka nema Sjálfstæðisflokks og Miðflokks.

„Mér líst rosalega vel á það sem ég held að verði. Ég er alveg sannfærð um að það sé kominn tími til breytinga og að við séum að fara að ná fram réttlæti fyrir fólkið okkar í landinu. Ég trúi því af öllu mínu hjarta,“ hefur mbl.is eftir henni.

Mjög ólíkar fréttir hafa verið fluttar af möguleikum þeirrar ríkisstjórnar en Vísir segir hana andvanafædda meðan Stundin segir hana á teikniborðinu.

Inga segist fyrst og fremst vera vinstri sinnuð.

„Miðað við velferð sem vinstrið hefur boðað og miðað við að ég hef aldrei verið annað en vinstrisinnuð, og ef allt í einu virkilega á að fara að vinna, þá er það bara frábært.“