Framkvæmdarstjóri Samtaka iðnaðarins, Sigurður Hannesson, setur ofan í við borgarstjórann Dag B. Eggertsson í Morgunblaðinu í dag. Tilefnið er ummæli borgarstjóra í kvöldfréttum RÚV, hvar hann sagði að skortur á byggingarkrönum og verktökum hamlaði hraðari uppbyggingu íbúða.

„Áhyggjur okkar lúta meira að því að það sé ekki nógu mikið af stórum og öflugum verktökum til að takast á við öll þessi verkefni … Það væri hægt að tvö- falda kraftinn ef það væri nógu mikið af krönum og mannskap til þess að gera það,“

sagði Dagur í gær.

Sigurður segir þetta af og frá, það sé skortur á lóðum sem hamli hraðari uppbyggingu:

„Í samtölum okkar við verktaka kemur í ljós að þau ummæli borgarstjóra að það vanti krana og mannskap til að byggja meira standast ekki skoðun. Það vantar hvorki krana né mannskap. Það sem er skortur á eru lóðir. Samtök iðnaðarins skora því á borgarstjóra að birta strax lista yfir lóðir hjá borginni sem eru lausar til úthlutunar og uppbygging getur hafist á. Verktakar munu þá ekki láta sitt eftir liggja.“

Samkvæmt skýrslu Íbúðarlánasjóðs er þörf á 17,000 íbúðum á næstu tveimur árum, til að mæta uppsöfnuðum skorti og raunþörf á húsnæði. Í gær kom fram hjá byggingarfulltrúa Reykjavíkurborgar, að um 18 mánuði tæki að byggja fokhelt fjölbýlishús á þéttingarreit að meðaltali, en um 19,000 íbúðir eru í startholunum, misjafnlega langt á veg komnar í ferlinu og er talað um metuppbyggingu í sögulegu ljósi.