Björn Bjarnason hefur lengi skammast út í RÚV vegna fréttaflutnings þess, sem Björn telur á tíðum vera ósanngjarnan, þá sérstaklega í garð Sjálfstæðisflokksins og aðilum honum tengdum. Hann fagnaði þó í dag á Facebook, frétt RÚV um að lögbann Glitnis gegn Stundinni snerist hvorki um Bjarna Benediktsson, eða kosningarnar.

Í dag fór fram aðalmeðferð í staðfestingarmáli Glitnis HoldCO gegn Stundinni og Reykjavík Media vegna lögbanns sem Sýslumaðurinn í Reykjavík setti á áðurtalda fjölmiðla, vegna fréttaflutnings þeirra um viðskipti Bjarna Benediktssonar á árunum fyrir hrun, sem byggðar voru á gögnum úr Glitni.

Blaðamenn Stundarinnar og Reykjavík Media neituðu í dag að upplýsa um hvernig þeir hefðu komist yfir gögnin úr Glitni, sem innihalda upplýsingar um þúsundir viðskiptavina bankans. Blaðamenn hafa sagt að fréttaflutningur þeirra beinist einungis að Bjarna og opinberum persónum, en lögmenn Glitnis eru ósammála þeirri fullyrðingu, þar sem ekki hafi verið gerð tilraun til að afmá upplýsingar sem birtust um óþekkt fólk, né gerð tilraun til þess að hafa samband við það. „Kröfur stefnenda hafa ekkert um forsætisráðherra fyrrverandi eða tímasetningu kosninga að gera,“ hafði RÚV eftir Ólafi Eiríkssyni, lögmanni Glitnis.

Björn Bjarnason fagnaði þessum fréttum RÚV á Facebooksíðu sinni í dag:

„Loksins komst þessi punktur að hjá fréttastofu ríkisútvarpsins. Þar hefur óteljandi sinnum verið gefið til kynna að lögbannið væri vegna Bjarni Benediktsson (ef.) og kosninganna. Upplýsingafalsanir birtast í ýmsum myndum.“