Leicester tók á móti Chelsea í 8-liða úrslitum FA-bikarsins í dag en leiknum lauk með 2-1 sigri gestanna.

Alvaro Morata kom Chelsea yfir en Jamie Vardy jafnaði metin fyrir Leicester í síðari hálfleik áður en Pedro tryggði Chelsea sigur með marki í framlengingu.

Antonio Conte, stjóri Chelsea var að vonum sáttur með að vera kominn áfram í undanúrslit keppninnar þar sem liðið mætir Southampton á Wembley.

„Þetta var erfiður leikur en við vissum það komandi inn í leikinn,“ sagði Conte.

„Ég er ánægður með strákana, við spiluðum vel og sýndum karakter eftir tapið gegn Barcelona í Meistaradeildinni.“

„Við vildum þetta meira í dag og mér fannst við sýna það á vellinum,“ sagði Conte að lokum.