Baldur Þórhallsson prófessor í stjórnmálafræði við Háskóla Íslands segir að það geti orðið kapphlaup hjá Viðreisn, Pírötum og Framsóknarflokknum að mynda ríkisstjórn með Vinstri grænum og Samfylkingu strax og fyrstu tölur verða birtar á laugardagskvöld. Samkvæmt nýjustu könnun Fréttablaðsins, sem er öllu marktækari en fyrri kannanir vegna úrtaksstærð, þá mælist Sjálfstæðisflokkurinn með afgerandi mest fylgi en myndi samt missa fjóra þingmenn frá síðustu kosningum.

Baldur segir á Fésbók að það gæti allt eins orðið kapphlaup hjá flokknunum á miðju að komast í stjórn með VG og Samfylkingunni:

VG er enn í bestri stöðu til að mynda ríkisstjórn. Samfylking kemur sterk inn. Hinir flokkarnir þrír munu hefja kapphlaupið um leið og fyrstu tölur verða birtar. Framsókn gæti þó orðið það löskuð eftir kosningar að hún fari hægt af stað en endasprettur verður þeim mun betri,

segir Baldur. Segir hann að kapphlaup Viðreisnar, Framsóknar og Pírata muni styrkja samningsstöðu VG og Samfylkingarinnar:

Kapphlaup minni flokkanna mun styrkja samningsstöðu VG og Samfylkingar. Þannig gæti, sterk velferðarstjórn, draumur VG orðið að veruleika – ef tekið er mið af skoðanakönnun Fréttablaðsins í dag.