„Það er ekki nema svona hálftími síðan síðustu skilaboð með hótunum bárust mér,“ segir Sema Erla Serdar, en hún hefur heldur betur þurft að taka við árásum frá sjálfskipuðum álitsgjöfum í þjóðfélaginu varðandi málefni innflytjenda og almenn mannréttindi. Flestum okkar þykir í hæsta máta óviðeigandi og rangt að ráðast að fólki vegna uppruna þess, kynþáttar, kynhneigðar eða trúarbragða. Þrátt fyrir það virðist fjöldi fólks telja það fullkomlega viðeigandi að senda Semu hótanir, athugasemdir eða óviðeigandi spurningar, hvort sem er á samfélagsmiðlum, með tölvupósti eða símleiðis á síðkvöldum.

„Einhvern veginn þykir fólki eðlilegt að taka upp símann á þriðjudagskvöldi klukkan hálfellefu til að skamma mig. Stundum er ég nú ekkert viss um fyrir hvað. Í síðustu viku hringdi til að mynda kona sem hljómaði nú ósköp eðlileg í upphafi og vildi ræða við mig um íslam og múslima. Það endaði með því að hún öskraði að íslam væri krabbamein heimsins og að hún skildi ekkert í femínistum að vera að púkka upp á múslima og samkynhneigða. Ég var, og er oft, furðu lostin.“

Ekki allir fullir

Sema segist alls ekki viss um að fólk sem hringir í hana sé í annarlegu ástandi, en eflaust séu einhverjir það. „Það er eins og svona hegðun þyki eðlileg, því fólk er ekki að hafa fyrir því að fela sig lengur. Áður fyrr skýldu þessir einstaklingar sér á bak við gerviprófíla á Facebook, og falin símanúmer, en það er liðin tíð. Oft lítur þetta út eins og sómafólk sem birtir myndir af sér með barnabörnunum, en notar svo frístundir til að ráðast á fólk með hatri á netinu. Mér finnst ótrúlega fyndið hvað þeim virðist þykja þetta eðlilegt, en það er kannski eitt af stóru vandamálunum.“

BDSM?

Nýverið birti karlmaður spurningu á Facebook-vegg Semu um hvort hún sæti í stjórn BDS. Sumir gerðu ráð fyrir að viðkomandi hefði gleymt einum staf í skammstöfuninni, og ætti við BDSM-félagið. Sema segir þó geta verið að hann hafi átt við palestínsku samtökin BDS sem beita sér fyrir sniðgöngu á vörum frá Ísrael. „Ég ákvað bara að svara þessu játandi, hvort sem um BDS eða BDSM væri að ræða. Svo spunnust hreint ævintýralegar umræður á þræðinum í kjölfarið.“

Sema segir að lokum í samtali við blaðakonu að hún sé ekki smeyk vegna hótananna, en þó varkár. „Ég hef valið að kæra ekki, þó að ég eigi til ýmislegt sem gefur tilefni til þess. Í staðinn skila ég skömminni með opinberri umræðu um erindin sem mér berast.“