Beth Morris, sem þótti sigurstrangleg í raunveruleikaþættinum The Voice sem sýndur er á BBC í Bretlandi, hefur hætt þátttöku í þáttunum. Beth var komin í átta manna úrslit þegar upp komst um kókaínneyslu hennar. Beth hefur nú stigið fram og viðurkennt að hún eigi við fíknivanda að stríða.

Beth, sem er 26 ára, var í liði bresku tónlistarkonunnar Palomu Faith og þótti hún einna líklegust til að bera sigur úr bítum í keppninni í ár. Átta manna úrslitin fóru fram í gærkvöldi, en nokkrum klukkustundum áður en þátturinn var sýndu spurðist út að Beth yrði ekki meðal þátttakenda. BBC sagði að ástæðurnar væru persónulegar. Í viðtali við breska blaðið Mirror í dag viðurkennir Beth þó að hún hafi glímt við fíknivanda undanfarin tvö ár.

„Mér þykir þetta leiðinlegt. Ég er fíkill. Ég hef valdið öllum sem koma að þættinum vonbrigðum. Fyrir tveimur árum áttaði ég mig á því að ég ætti í vandræðum vegna fíkniefnaneyslu minnar. Ég notaði fíkniefni til að höndla betur ýmis vandamál í mínu einkalífi,“ segir hún. Mirror greinir frá því að hún hafi notað kókaín meðan á tökum á þættinum stóð en sjálf hafnar Beth því.

Í viðtalinu viðurkennir hún að hafa farið í meðferð vegna fíknar sinnar, en hún hafi fallið í kjölfarið. Brotthvarf Beth í gærkvöldi þýddi að tveir þátttakendur voru sendir heim í stað fjögurra. Hér að neðan má sjá myndband af því þegar Beth heillaði dómnefndina upp úr skónum fyrr í vetur.

[youtube https://www.youtube.com/watch?v=dEUyPPiK6og&w=560&h=315]