Arne Slot hefur óskað Arsenal til hamingju með Englandsmeistaratitilinn og hrósað Mikel Arteta og þjálfarateymi félagsins fyrir frábært starf á tímabilinu.
„Ég óska Arsenal innilega til hamingju með titilinn. Mikel og hans fólk hafa unnið frábært starf,“ sagði Slot á blaðamannafundi.
Hollendingurinn benti þó á að Arsenal-liðið í ár hafi verið öðruvísi en mörg önnur meistaralið síðustu ára, sérstaklega hvað varðar föst leikatriði.
„Þetta er í fyrsta skipti í 30 ár sem um 40 prósent marka meistaraliðs koma úr föstum leikatriðum,“ sagði Slot og vísaði þar til styrkleika Arsenal í hornspyrnum og aukaspyrnum.
Slot tók einnig undir orð Luis Enrique, þjálfara Paris Saint-Germain, sem nýlega hrósaði Arsenal fyrir varnarleik sinn.
„Luis Enrique sagði að Arsenal væri besta liðið án bolta í deildinni og ég er sammála því,“ sagði Liverpool-stjórinn.
Arsenal tryggði sér meistaratitilinn fyrr í vikunni eftir að Manchester City missti stig gegn Bournemouth. Þetta er fyrsti Englandsmeistaratitill félagsins síðan árið 2004.
Slot og Liverpool berjast nú fyrir því að tryggja sér sæti í Meistaradeild Evrópu fyrir næsta tímabil.
