Huntley lést 52 ára að aldri í mars síðastliðnum eftir alvarlega árás í fangelsinu HMP Frankland í Durham-sýslu á Englandi. Hann var barinn til óbóta með málmstöng af samfanga sínum og lést af sárum sínum nokkrum dögum eftir árásina.
Hann afplánaði lífstíðardóm fyrir morðin á Holly Wells og Jessica Chapman í Soham árið 2002, en stúlkurnar voru aðeins tíu ára gamlar. Málið er eitt það umtalaðasta í breskri réttarfarssögu á síðustu áratugum.
Samkvæmt The Sun var lík Huntleys flutt frá Royal Victoria-sjúkrahúsinu í Newcastle í líkbrennslu í nágrenninu eftir andlát hans. Fjölskyldu hans stóð til boða styrkur fyrir útförinni að verðmæti um 3.000 punda, um 500 þúsund króna, en hún hafnaði boðinu af virðingu við aðstandendur fórnarlamba hans.
„Það var engin útför, engin athöfn og engir syrgjendur,“ hafði blaðið eftir heimildarmanni.
Sá sami sagði jafnframt: „Fjölskyldan var samstíga, hvernig hefði hann getað fengið útför eftir það sem hann gerði?“
Þá kom einnig fram að hugsanir fjölskyldunnar væru áfram hjá fórnarlömbunum og aðstandendum þeirra.
„Hann var brenndur og það var allt og sumt, ekkert meira,“ sagði heimildarmaðurinn samkvæmt The Sun.
Ösku Huntleys var síðar dreift á leynilegum stað af ættingja hans.
Dánarrannsókn sem hófst í síðasta mánuði komst að þeirri niðurstöðu að Huntley hefði látist af völdum höfuðáverka eftir barefli. Frekari rannsókn verður framkvæmd þegar sakamál gegn meintum árásarmanni hans, Anthony Russell, lýkur.
