Kristrún Frostadóttir forsætisráðherra og formaður Samfylkingarinnar er nú á ferð um landið í aðdraganda sveitarstjórnarkosninganna. Hún er væntanleg til Fjallabyggðar þar sem hún mun halda opin fund í kvöld ásamt Loga Má Einarssyni menningar-, nýsköpunar- og háskólaráðherra og 1. þingmanni Norðausturkjördæmis og á fundinum verða einnig frambjóðendur flokksins í Fjallabyggð. Róbert Guðfinnsson athafnamaður á Siglufirði ritar af því tilefni pistil á Facebook þar sem hann hrósar Kristrúnu en ekki er hægt að segja að Logi og Samfylkingin sjálf fái jafn hlýleg orð.
Róbert segir um Kristrúnu:
„Þó að ég muni seint kjósa flokk hennar þá hef ég haft gaman af innkomu hennar í íslensk stjórnmál. Það má segja að hún sé ferskur vindur í oft einsleitu umhverfi.“
Athafnamaðurinn hefur hins vegar ekki jafn mikið álit á Loga:
„Með henni í för er þingmaður kjördæmisins Logi Einarsson sem er jafnframt ráðherra menningar, nýsköpunar og háskóla. Fjallabyggð hefur sennilega aldrei haft ráðherra í kjördæminu sem er jafn lítið tengdur inn í atvinnulíf og stöðu samfélagsins.“
Ljóst er að Kristrún stoppar ekki lengi á hverjum stað á ferð sinni um landið. Í morgun fundaði hún á Raufarhöfn og í hádeginu á Húsavík. Klukkan 17 verður fundur með henni á Akureyri og fundalota dagsins endar síðan í Fjallabyggð en fundurinn þar verður á Siglufirði og hefst klukkan 20.
Róbert telur ljóst að á slíkri hraðferð fái Kristrún ekki mikla innsýn inn í raunveruleikann á hverjum stað.
Hann gagnrýnir forystumenn Samfylkingarinnar í Fjallabyggð. Flokkurinn býður í kosningunum eftir 10 daga fram lista í samvinnu við óháða frambjóðendur, undir merkjum Jafnaðarmannafélags Fjallabyggðar og óháðra, en félagið er eitt af aðildarfélögum Samfylkingarinnar og listinn er með listabókstaf flokksins, S.
Í kosningunum 2022 var boðinn fram í Fjallabyggð listi Jafnaðarfólks og óháðra sem var með listabókstafinn A en framboðið fékk 36,15 prósent atkvæða og 3 bæjarfulltrúa en 7 sitja í bæjarstjórn Fjallabyggðar. Framboðið myndaði meirihluta með Sjálfstæðisflokknum.
Róbert fer ekki leynt með óánægju sína með forystumenn Jafnaðarmanna í Fjallabyggð:
„Samfylkingin eða jafnaðarmenn hafa um árabil verið lík í lestinni í samfélaginu Fjallabyggð, með áhrifavalda og fulltrúa þar sem óhreinlyndi og eiginhagsmunagæsla hefur of oft verið aðalsmerkið. Fyrir þá sem þurfa að lifa við þetta er ansi skondið að hið nýja útspil flokksins fyrir komandi sveitarstjórnarkosningar sé: „Tökum ábyrgð hvert á öðru.“ Ef Kristrún ætlar að sjá flokk sinn verða að því sem hana dreymir um þá þarf hún að hreinsa til í lestinni. Upplagt væri að byrja í Fjallabyggð. Þar er nóg af auðu iðnaðarhúsnæði — þó líklega væri betra að nota það í atvinnuuppbyggingu en líkbrennsluofna.“
Er þessi nýja pistill framhald af pistli Róberts í gær þar sem hann gagnrýnir forystumenn Jafnaðarmanna í bæjarstjórn og vill meina að þeir hafa skaðað atvinnulífið í bænum með því að hræða fólk frá því að keyra til Siglufjarðar með fullyrðingum um að hættulegt væri að aka um Siglufjarðarveg og Strákagöng. Róbert nefnir engin nöfn en vill meina að einhver sem hann kallar „Guðföðurinn“ standi á bak við þetta. Er Róbert spurður í athugasemdum hvort umræddur maður sé Kristján Möller fyrrum þingmaður og ráðherra Samfylkingarinnar sem er eins og Róbert meðal þekktustu íbúa Siglufjarðar.
