Hvíta húsið hefur sent frá sér yfirlýsingu um öryggismál á HM karla í fótbolta í sumar í kjölfar skotárás sem beindist að Donald Trump Bandaríkjaforseta um helgina.
Atvikið átti sér stað á Washington Hilton í Washington DC þar sem árlegur kvöldverður Hvíta hússins fór fram. Maður vopnaður skotvopni og hnífum komst í gegnum öryggishlið og hleypti af nokkrum skotum áður en hann var yfirbugaður.
Mikið af háttsettu fólki var á staðnum en engum varð meint af. Í kjölfarið hafa þó vaknað spurningar um öryggismál fyrir HM sem fer fram í Bandaríkjunum, Kanada og Mexíkó í sumar.
„Þetta verður eitt stærsta mót sögunnar og unnið er náið með FIFA og yfirvöldum til að tryggja öryggi allra. Lögð verður áhersla á að þetta verði öruggasti viðburður sögunnar,“ segir hins vegar í yfirlýsingu Hvíta hússins, meðal annars.
