En hann tapaði hressilega í nýafstöðnum þingkosningum eftir 16 ár í forsætisráðherrastólnum. Við þennan ósigur missti Pútín vin sinn í ESB og manninn sem hafði stöðvað lánveitingu upp á 90 milljarða evra til Úkraínu.
En það er ekki bara Ungverjaland sem færist fjær Rússlandi og Pútín. Áhrif hans í öðrum löndum, sem hann vill gjarnan stýra, fara einnig þverrandi.
Þetta sagði Arne Bård Dalhaug, fyrrum yfirliðsforingi og stjórnandi varnarmálaskóla NATÓ, í samtali við Dagbladet.
„Rússland hefur misst mikil áhrif í Sýrlandi, Venesúela, Aserbaídsjan, Moldóvu og nú síðast í Ungverjalandi. Það er engin vafi á að vinahópurinn hefur minnkað mikið,“ sagði hann.
Hann benti á að eftir að Bashar al-Assad, einræðisherra í Sýrlandi, hrökklaðist frá völdum 2024 hafi hinum nýja leiðtoga landsins, Ahmed al-Sharaa, verið tekið opnum örmum af Bandaríkjunum og öðrum vestrænum ríkjum. Fall Assad hafi verið þungt högg fyrir áhrif Rússa í Miðausturlöndum.
Dalhaug sagði einnig að svo virðist sem Pútín hafi einnig misst tengslin við Venesúela í kjölfar þess að Bandaríkjamenn handsömuðu Nicolás Maduro, forseta, og fluttu til Bandaríkjanna.
Hvað varðar samband Rússlands og Aserbaídsjan sagði hann að það einkennist nú af miklu vantrausti og sögulegu brotthvarfi undan áhrifum Moskvuvaldsins.
Einnig hafi Moldóva tekið afstöðu gegn Pútín og Rússlandi og halli sér nú að Vesturlöndum.
