Snorri Másson þingmaður og varaformaður Miðflokksins er ósáttur við að grunnskólar landsins flaggi regnbogafánanum og segir þar um brot á pólitísku hlutleysi skólanna að ræða.

Regnbogafáninn er eins og flestir vita alþjóðlegt tákn hinsegin fólks. Snorri segir í nýjum pistli á Facebook að hann hafi átt orðastað á Alþingi í gær við Ingu Sæland mennta- og barnamálaráðherra um þá staðreynd að fánanum sé flaggað í grunnskólum. Vildi hann meina að það væri umdeilt að flagga fánanum við grunnskóla og við leikskóla. Segist hann hafa á þinginu rifjað upp heimsókn í kjördæmaviku á síðasta ári í nýlegan grunnskóla í Reykjavík en hann sjálfur og Inga hafi bæði farið með í heimsóknina:

„Þar vakti það athygli mína að nánast hver einasti starfsmaður skólans gekk um með hálsband í fánalitunum, skólabókasafnið var allt þakið flennistórum regnbogafánum, auglýst var hinsegin-félagsmiðstöð fyrir allt frá 5. bekk og félagsmiðstöðin alsett sambærilegum skreytingum.“

Vill Snorri meina að um hugmyndafræðilegar áherslur sé að ræða en virðist ekki líta svo á að málið snúist um að tryggja réttindi hinsegin fólks og að það sé álitið fullgildir meðlimir samfélagsins:

„Er ekki eitthvað bogið við hugmyndafræðilegar áherslur í skólakerfinu þegar slíkir fánar, sem minna sífellt meira á einhvers konar veraldleg trúartákn, eru ekki óvíða meira áberandi en sjálfur íslenski þjóðfáninn?“

Hlutleysi

Segir Snorri að skólar eigi að vera hlutlausir í þessum efnum en virðist ekki álíta að þeir eigi að gegna nokkru hlutverki við að standa vörð um mannréttindi minnihlutahópa eins og hinsegin fólks:

„Vissulega geta fánarnir þjónað því hlutverki að styrkja tilfinningu skólastjórnenda eða annarra starfsmanna fyrir eigin botnlausu manngæsku, enda yfirlýstur tilgangur þeirra auðvitað að þeir séu sérstök tákn umburðarlyndis, en fyrir mörgum foreldrum fela þeir mun frekar í sér óþægilegt brot á pólitísku hlutleysi skólanna. Fæstir þora þó að gera athugasemdir við málið og það er hin þekkta þversögn umburðarlyndisins. Það er allt annað en umburðarlyndi sem mætir þeim sem voga sér að lýsa efasemdum um fánana, að ekki sé talað um margvíslegan annan fræðsluáróður í skólunum eða umfangsmikla fræðslusamninga við Samtökin 78, á meðan kristinni kirkju og íþróttafélögum er úthýst úr skólunum.“