Upplegg Ólafs Inga Skúlasonar og Breiðabliks gekk vel upp gegn Íslandsmeisturum Víkings í opnunarleik Bestu deildarinnar síðastliðinn föstudag.

Blikar mættu til leiks í þriggja hafsenta kerfi og áttu Íslandsmeistararnir fá svör. Þurfti mistök frá Antoni Ara Einarssyni í markinu til að Víkingur gæti jafnað í 1-1, en þannig lauk leiknum.

Þetta var til umræðu í hlaðvarpinu Dr. Football í samhengi við ummæli Óskars Hrafns Þorvaldssonar, þjálfara KR, í útvarpsþættinum Fótbolti.net á dögunum. Í upprifjun á 0-7 tapi hans manna gegn Víkingi í fyrra sagði Óskar:

„Ég átta mig á því að auðveldasta leiðin til að ná úrslitum á móti Víkingi er að falla niður í 5-4-1 og hleypa leiknum upp í einhvers konar kaos, Víkingi líður illa í kaosi. Þeim hefur gengið verr að brjóta niður fimm manna blokkir.“

Jóhann Skúli Jónsson, sem stýrði Dr. Football þennan þáttinn, birti klippuna. „Það er eins og Ólafur Ingi hafi bara hlustað á þetta,“ sagði Jóhann.