Fulltrúar Liverpool og Manchester United fylgdust með leik RB Leipzig og Borussia Mönchengladbach í vikunni, nánar til tekið vinstri bakverðinum David Raum.

Þýski landsliðsmaðurinn átti stórleik í 1-0 sigri Leipzig og sannfærði fulltrúa félaganna um að hann væri tilbúinn fyrir ensku úrvalsdeildina samkvæmt vefmiðlinum Teamtalk.

Raum, sem er 27 ára, er lykilmaður hjá Leipzig og er öflugur sóknar- og varnarlega. Hann er með þrjú mörk og sex stoðsendingar í deildinni.

Hjá Liverpool er verið að leita arftaka fyrir Andy Robertson, sem gæti verið á förum í sumar, á meðan United vill auka samkeppni við Luke Shaw, sem hefur glímt mikið við meiðsli eins og flestir vita.

Samningur Raum rennur út árið 2027, sem þýðir að Leipzig gæti neyðst til að selja hann í sumar frekar en að missa hann frítt ári síðar.