Ruben Amorim gæti snúið aftur í þjálfun rúmum mánuði eftir að hafa verið rekinn frá Manchester United.

Amorim var látinn taka pokann sinn 5. janúar eftir 1-1 jafntefli gegn Leeds og fékk samkvæmt fréttum um 12 milljónir punda í starfslokagreiðslur. Michael Carrick tók tímabundið við liðinu í kjölfarið.

Nú er Amorim orðaður við brasilíska félagið Vasco da Gama sem leitar að nýjum stjóra eftir brottrekstur Fernando Diniz. Amorim er sagður einn af helstu mönnum á blaði ásamt Artur Jorge.

Þá hefur hann einnig verið orðaður við Benfica, þar sem hann lék á sínum tíma. Hann er afar vel liðinn innan félagsins og svo gæti farið að núverandi stjóri liðsins, Jose Mourinho, fari í sumar.

Amorim sló í gegn með Sporting í heimalandinu áður en hann tók við United, þar sem gekk ekki eins vel, eins og flestir vita.