Juventus er í leit að markmanni fyrir sumargluggann og er Alisson, markvörður Liverpool, til að mynda á blaði.

Ítalska blaðið Gazzetta dello Sport segir frá þessu, en þar kemur sömuleiðis fram að félagið fylgist með gangi mála hjá markverði Tottenham, Guglielmo Vicario.

Alisson, sem er orðinn 33 ára gamall, hefur reynst félaginu frábær þjónn síðan hann kom þangað 2018. Hann á enn um eitt og hálft ár eftir af samningi sínum á Anfield.

Juventus var auðvitað langbesta lið Ítalíu um árabil en hefur ekki náð fram sínu besta undanfarin ár. Liðið vann Ítalíumeistaratitilinn síðast árið 2020 og var þá að vinna hann níunda árið í röð.