Lögreglustjórinn á höfuðborgarsvæðinu hefur ákært 16 manns, þar af 13 karla og þrjár konur, fyrir hin ýmsu brot sem öll eru framin fyrir alllöngu síðan, á árunum 2019 til 2021. Flest ákærðu eru Íslendingar. Brotin varða þjófnað, skjalafals, fikniefnamisferli, byssueign og fleira.
Af lestri ákærunnar virðist hópurinn ekki heildstæður heldur eru einn til þrír aðilar ákærðir fyrir hvert brot og þessir einstaklingar allir tengjast síðan ýmist beint eða óbeint. Virðist sem um sé að ræða uppsöfnuð mál sem hafa dregist í rannsókn eða í meðförum dómsvaldsins.
Fyrirtaka er í málinu við Héraðsdóm Reykjavíkur síðar í mánuðinum en samkvæmt heimildum DV verður stór hluti af ákærunni felldur niður og gerð dómsátt í öðrum ákæruliðum þar sem játað er sök. Mun því málinu ljúka þar og ekki koma til aðalmeðferðar.
Tveir af sakborningunum eru ákærðir fyrir að hafa svikið út heimabíó og tölvuskjá úr verslun Origo með því að framvísa falsaðri beiðni frá Fiskmarkaði Suðurnesja, samtals að verðmæti tæplega 900 þúsund krónur. Í þremur tilvikum eru síðan einstaklingar ákærðir fyrir að svíkja út vörur úr verslun Símans í Ármúla, einnig með fölsuðum beiðnum frá Fiskmarkaði Suðurnesja. Brotin voru framin árið 2019.
Þrír menn eru síðan ákærðir fyrir þjófnað á átta stólum úr verslun Svefn og heilsu í Reykjavík. Þjófnaðurinn var skipulagður en brotið voru framin í nóvember árið 2020.
Kona og karlmaður eru sökuð um að hafa reynt að flytja inn, í desember árið 2020, um 350 grömm af kókaíni frá Belgíu. Voru fíkniefnin falin í rafhlöðuhólfi svibrettis sem flytja átti í pakka með DHL flutningafyrirtækinu. Belgísk yfirvöld haldlögðu efnin og komu gerviefnum fyrir í staðinn. Konunni var síðan afhentur pakkinn á heimili hennar.
Fjórir karlmenn eru síðan ákærðir fyrir að hafa í félagi reynt að flytja inn tæp 400 grömm af kókaíni. Brotið var framið í mars árið 2021. Efnin voru falin í loki pappakassa í póstsendingu frá Dóminíska lýðveldinu. Var einn ákærðu í samskiptum við aðila þar í landi um fyrirkomulag sendingarinnar, um hve mikið af efnum yrði sent til Íslands, hvert verðið væri fyrir þau, með hvaða hætti efnin yrðu send til landsins og hvernig ætti að greiða fyrir þau. Gaf aðilinn í Dóminíska lýðveldinu hinum ákærða nákvæmar leiðbeiningar um þetta en lögreglan komst yfir samskiptagögn mannanna.
Einn 16-menninganna er ákærður fyrir að hafa aðfaranótt mánudagsins 14. desember 2020 stolið kerru af gerðinni Ifor Williams við Árskóga í Reykjavík og gröfu af gerðinni Yanmar Vio 3.3. við Köllunarklettsveg, en samtals voru kerran og grafan að verðmæti um 9 milljónir króna. Flutti ákærði gröfuna á kerrunni sömu nótt í Vatnsendahverfið í Kópavogi þar sem annar ákærði var að byggja fasteign.
Einn sakborninga er ákærður fyrir brot á vopnalögum en hann var með skammbyssu af gerðinni Browning í bíl sínum en lögreglan lagði jafnframt halda á fíkniefni sem hún fann á heimili ákærða og konu hans, sem er einnig ákærð í málinu. Fannst tæplega hálft kíló af afmetamíni á heimili þeirra í Grindavík.
Framansagt er aðeins hluti af brotunum sem tilgeind eru í ákærunni, en þau skipta tugum. Sem fyrr segir verður stór hluti brotanna felldur niður en önnur mál verða leyst með játningu og dómsátt.
