Þórður Andrésson af ætt Oddaverja snerist gegn Gissuri Þorvaldssyni í átökum Sturlungaaldar á 13du öld. Þessi andstaða Þórðar misheppnaðist hrapallega og var hann handtekinn af Gissuri og tekinn af lífi. Þegar Þórður baðst vægðar og fyrirgefningar sagðist Gissur fyrirgefa honum þegar hann væri dauður.

Ég var alinn upp á vinstri sinnuðu heimili. Faðir minn gaf ungur út fjölritað dreifiblað í Borgarnesi sem hann kallaði Hamar og Sigð. Hann fór til Þýskalands skömmu fyrir valdatöku Nasista og kynntist hatrammri innbyrðis baráttu og átökum vinstri aflanna.

Heimkominn gerðist hann félagi í Sósíalistafélagi Reykjavíkur en honum var bolað úr flokknum í átökum vegna Ungverjalandsmálsins 1956. Eftir það skipti hann sér lítið af pólitík. Þegar saga íslenskra róttæklinga er skoðuð mótast hún af alvarlegum innanflokksátökum. Fjöldi manns var rekinn úr flokknum með skömm fyrir alls konar hugmyndafræðilegar yfirsjónir. Menn gengu venjulega hreint til verks og útskúfuðu óvinum sínum til að losna við þá af hinu pólitíska leiksviði. Þetta voru kallaðar hreinsanir að sovéskri fyrirmynd.

Þjóðin hefur á liðnum vikum fylgst með heiftarlegum átökum í hinum nýja sósíalistaflokki. Þar er fyrst og fremst tekist á um menn frekar en málefni. Hópur yngri uppreisnarmanna tók völdin í flokknum en gamla stjórnin var ekki rekin á brott eins og í gamla daga heldur sat sem fastast. Smám saman tókst henni með beinskeyttum áróðri og fjölmiðlafári að ná völdum í ákveðnum stofnunum flokksins. Skyndilega var nýja byltingarstjórnin gerð brottræk úr húsnæði flokksins en hinir sátu eftir.

Maður skilur betur en áður stjórnarhætti Stalíns, Gómúlka og Ulbrichts og fleiri kommúnistaleiktoga. Þeir gerðu andstæðinga sína annaðhvort höfðinu styttri eða fangelsuðu þá til langframa. Brottreknir fengu ekki að koma nálægt neinu flokksstarfi enda stimplaðir sem stéttarsvikarar. Flokkurinn starfaði í anda Gissurar Þorvaldssonar og fyrirgaf mönnum ekki fyrr en þeir voru dauðir. Greinilegt er á þróun mála hjá nútíma arftökum kommúnistaflokksins að þeir hafa ekkert lært af sögunni. Jósef Stalín og Gissur hefðu aldrei leyft gömlu valdaklíkunni að ná aftur vopnum sínum og taka yfir útvarpsstöðina, húsnæðið og sjóðina.