ÍA ætlaði að ráða Jóhannes Karl Guðjónsson sem þjálfara en verðmiðinn á að fá hann frá AB í Danmörku var slíkur að félagið gat ekki gert þetta.

Þessu heldur Sæbjörn Steinke fréttamaður Fótbolta.net fram, fyrst var talað um 2 milljónir íslenskra króna en líklega voru það 2 milljónir danskra króna sem það kostaði.

Skaginn rak Jón Þór Hauksson úr starfi og að endingu var það Lárus Orri Sigurðsson sem tók við keflinu.

„Formaðurinn sagði að varaáætlunin hefði verið klár, þeir ætluðu að taka Jóhannes Karl,“ sagði Sæbjörn á Fótbolta.net.

Jóhannes Karl er öllum hnútum kunnugur á Akranesi og hefur stýrt liðinu auk þess að alast þar upp og spila fyrir félagið.

„Ég sagði frá því síðast að það kostaði 2 milljónir að fá Jóhannes Karl, mögulega 2 milljónir í öðrum gjaldmiðli. Nú heyrir maður að verðmiðinn sé 50 milljónir króna, rúmar 2 milljónir danskra króna.“

„Ég hef heyrt að þeir hafi haldið að hann myndi ekki kosta svona mikið, allt sem ég heyri er að Jói Kalli hafi verið klár.“