Þorkell Máni Pétursson, umboðsmaður og stjórnarmaður KSÍ, var gestur Helga Fannars Sigurðssonar í nýjasta þætti af Íþróttavikunni á 433.is.

Í þættinum var komið inn á aðstöðumálin í Laugardalnum, en verið er að klára að leggja nýtt hybrid-gras á vallarflötinn þar svo hægt sé að nota hann stærri hluta ársins.

„Þetta lítur mjög vel út. Það er stefnt að því að fyrsti leikurinn verði á móti Frökkum og við þurfum fullan Laugardalsvöll, ögra stelpunum aðeins áður en þær fara á EM,“ sagði Máni í þættinum, en leikur kvennalandsliðsins við Frakka er í byrjun næsta mánaðar.

Máni segir þó að nú megi ekki taka augun af boltanum.

„Staðreynd málsins er samt sú að það er frábært að við fengum þessar 500 milljónir til að búa til þetta gras, en vallaraðstaðan hérna er samt til skammar, það er ekki hægt að segja annað. Þetta er engum að kenna nema stjórnmálamönnum. Að það sé ekki hægt að forgangsraða hlutum hérna.

Knattspyrnuhreyfingin á að ganga fyrir í uppbyggingu. Þetta er sú íþrótt sem skilur langstærsta viðskiptaspor eftir af öllum íþróttum á Íslandi. Við búum hér til atvinnumenn sem fara út, búa til tekjur, flytja hérna heim með alla þessa peninga. Við fáum tekjur fyrir Evrópuárangurinn hjá Víkingum, þetta telur í hundruðum milljóna eða jafnvel milljarði.“

Þó fótboltinn sé stærstur megi þó ekki gleyma öðrum sérsamböndum, sem einnig þarf bætta aðstöðu.

„En þetta á ekki bara við um fótboltann, frjálsar íþróttir þurfa betri aðstöðu, handboltinn og körfuboltinn. Það er alveg ótrúlegt hvað er búið að fresta þessu lengi. Hugleysan og vitleysan, svo kemur nýr ráðherra reglulega og skrifar einhverja yfirlýsingu og svo er rosalega vinsælt að taka myndir.“