Knattspyrnudeild Aftureldingar minnist Guðjóns Ármanns Guðjónssonar á samfélagsmiðlum sínum, Guðjón var sjálfboðaliði fyrir félagið í mörg ár.
Guðjóns var minnst fyrir leik liðsins gegn Stjörnunni í Bestu deild karla á mánudag, þar vann Afturelding frækinn 3-0 sigur og var sigurinn tileinnkaður Guðjóni.
Guðjón lést 49 ára gamall. „Í sigurleik Aftureldingar á Stjörnunni í gærkvöldi spiluðu leikmenn Aftureldingar með sorgarbönd til að minnast Guðjóns Ármanns Guðjónssonar. Guðjón var öflugur sjálfboðaliði knattspyrnudeildar Aftureldingar og foreldri hjá félaginu en hann féll frá í síðustu viku, allt of snemma,“ segir í færslu frá Afturelding.
Guðjón var alltaf boðinn og búinn til þess að hjálpa félaginu. „Fyrir leikinn á Malbikstöðinni að Varmá í gærkvöldi klöppuðu þátttakendur leiksins og áhorfendur fyrir Guðjóni í eina mínútu til að heiðra minningu hans. Guðjón var einn af þeim sem var alltaf klár þegar á þurfti að halda, alveg sama hvert tilefnið var. Skipuleggja heimaleiki, standa í gæslu, safna styrktar- og samstarfsaðilum, eða halda utan um herrakvöld. Gaui var alltaf mættur og klár. Hann hafði orkuna og viljan, og mikla ástríðu til að styrkja knattspyrnulið Aftureldingar og byggja þannig upp fótboltann í Aftureldingu.“
Félagið hefur nú kvatt góðan sjálfboðaliða og segir að lokum. „Aftureldingar fjölskyldan hefur kvatt einn af sínum bestu mönnum. Afturelding sendir fjölskyldu og vinum Guðjóns innilegar samúðarkveðjur.“
