Bjarni Helgason skrifar frá Ermelo:

„Spennustigið er á góðum stað. Auðvitað erum við spenntar en við reynum að nýta okkur það á jákvæðan hátt,“ sagði Gunnhildur Yrsa Jónsdóttir, leikmaður íslenska liðsins í samtali við 433.is í gærdag.

Íslenska liðið mætir Frökkum í opnunarleik sínum á EM 2017 á morgun en leikurinn fer fram í Tilburg.

„Það er stutt í leik þannig að við þurftum í raun að koma okkur strax niður á jörðina sem við höfum gert. Maður notar þetta bara sem auka orku og með svona stuðning á bakinu þá er allt hægt.“

Æskuvinkona Gunnhildar lenti í alvarlegu hjólreiðarslysi í byrjun sumars og lamaðist fyrir neðan brjóst en Gunnhildur ætlar sér að spila fyrir hana á mótinu.

„Það tók rosalega á mig þegar að þetta gerist og þetta var rétt fyrir Brasilíu leikinn. Ég reyni að nota þetta sem hvatningu fyrst og fremst, hún er þvílík hetja og algjör fyrirmynd. Hún gefur mér auka orku og ég mun fara í hvern leik og spila fyrir hana.“

Viðtalið í heild sinni má sjá hér fyrir ofan og neðan.