Alan Brazil, fyrrum leikmaður Manchester United, hefur greint frá alvarlegri lífsreynslu eftir að hafa gengist undir lifrarígræðslu sem bjargaði lífi hans.

Hann hafði drukkið óhóflega af áfengi um langt skeið.

Brasil, sem er 66 ára, hefur verið frá störfum hjá talkSPORT í þrjá mánuði en sneri nýverið aftur í stuttan tíma til að uppfæra hlustendur um stöðu sína. Hann upplýsti að aðgerðin hafi staðið yfir í átta klukkustundir og að hjarta hans hafi stöðvast á meðan á henni stóð.

„Ég er hreint út sagt mjög heppinn,“ sagði hann og viðurkenndi að hann hafi óttast að hann kæmist ekki lífs af.

Aðgerðin fór fram á Addenbrooke’s sjúkrahúsinu í Cambridge eftir að læknar töldu að líf hans væri í hættu án ígræðslu.

Hann dvaldi í yfir fimm vikur á sjúkrahúsi, þar af viku á gjörgæslu.

Þrátt fyrir að vera á batavegi glímir hann enn við svefnvandamál og vökvasöfnun í líkamanum, en læknar telja það eðlilegt á þessu stigi.

Brazil segist nú finna mikinn mun á líðan sinni og ætlar að taka bataferlið rólega á næstu vikum.