Sara Björk Gunnarsdóttir skrifaði undir eins og hálfs árs samning við Hauka í dag. Snýr hún þar með heim í uppeldisfélagið eftir glæstan atvinnumanna- og landsliðsferil.

Margmenni var í knatthúsi Hauka er Sara Björk var kynnt til leiks í dag, enda eftirvæntingin mikil. Aðdragandinn að þessum skiptum hefur verið langur, allt að fimm ár.

„Tilfinningin er ótrúlega góð. Ég er ótrúlega sátt við þessa ákvörðun og líður mjög vel með þetta. Þetta er búinn að vera langur aðdragandi og við búin að vera í miklum samskiptum. Mér fannst eitthvað fallegt við það að koma heim á Ásvelli, þar sem þetta allt byrjaði,“ sagði Sara Björk við 433.is á Ásvöllum í dag.

„Haukarnir hafa bara alltaf staðið við bakið á mér. Mér þykir ótrúlega vænt um þennan klúbb. Þau hafa gert allt fyrir mig, sérstaklega á þeim tíma sem ég meiddist hérna, gerðu allt til að ég gæti komið til baka. Dóri (Halldór Jón Garðarsson, formaður meistaraflokksráðs kvenna) heyrði í mér á árs fresti, til að spyrja hvað ég ætlaði að gera. Mér fannst ekki spurning að koma hingað.“

Sara Björk sagði jafnframt að það hafi alltaf verið fyrsti kostur sinn að koma í Hauka er ljóst varð að hún sneri heim. „Breiðablik heyrði í mér en það var mjög stutt. Haukarnir voru alltaf í fyrsta sæti,“ sagði fyrrum landsliðsfyrirliðinn, sem lék einnig með Blikum hér heima áður en hún hélt út í atvinnumennsku á sínum tíma.

Sara Björk verður fyrst gjaldgeng með Haukum þann 16. júlí, er liðið heimsækir Keflavík.

Ítarlegt viðtal við Söru Björk er í spilaranum hér ofar.