Hinn 17 ára gamli Viktor Bjarki Daðason var í dag valinn í íslenska A-landsliðið í fyrsta sinn. Landsliðsþjálfarinn Arnar Gunnlaugsson hefur tröllatrú á framherjanum unga.

Viktor hefur slegið í gegn með FC Kaupmannahöfn á leiktíðinni og vakti sérstaklega mikla athygli í Meistaradeild Evrópu á fyrri hluta leiktíðar. Ætti hann að geta spilað stóra rullu í landsliðinu einn daginn ef allt er eðlilegt.

Arnar ræddi við 433.is í dag í tilefni að valinu á landsliðshópnum, raunar tveimur hópum sem mæta annars vegar Japan 31. maí og Argentínu 10. júní. Viktor er valinn í fyrri leikinn.

„Það hefur verið ótrúlega gaman að fylgjast með hans þróun síðasta árið, það traust og pressu sem klúbburinn hefur sett á hann. Það sýnir að hann er ekki bara þroskaður leikmaður heldur líka þroskuð persóna,“ sagði Arnar.

Uppgangur Viktors hefur verið ansi hraður, en hann kom til FCK frá Fram 2024.

„U-19 ára landsliðið, U-21 árs landsliðið og núna A-landsliðið, sumir gætu spurt hvort þetta sé að gerast of fljótt en miðað við hversu þroskaður einstaklingur hann er vil ég að hann taki sem flest skref og massi þau,“ sagði Arnar.

FCK er þekkt fyrir að kaupa unga leikmenn, breyta þeim í stjörnur og selja dýrt. Má þar nefna Hákon Arnar Haraldsson og Orra Stein Óskarsson, lykilmenn í landsliðinu. Telur Arnar að það styttist í næsta skref hjá Viktori?

„Það kæmi mér ekki á óvart. Þú fylgist með okkar strákum sem hafa farið út þessa nákvæmlega sömu leið. Þeir hafa kannski verið 1-2 árum eldri þegar þeir taka svo skrefið fram á við.

Ef hann verður áfram er það frábært því þetta er frábær klúbbur og greinilegt að þeir setja traust á hann. En klúbbur eins og FCK, þeir vita alveg hvar þeir eru í fæðukeðjunni. Þeir gera eins vel með hann og hægt er og selja hann svo fyrir góðan pening.“

Ítarlegt viðtal við Arnar má nálgast í spilaranum hér ofar.