Óróinn innan Real Madrid virðist halda áfram eftir að upplýst var hver varð fyrir barðinu á Antonio Rüdiger í átökum á æfingu á dögunum.

Samkvæmt spænskum miðlum var það Álvaro Carreras sem lenti í samstuði við þýska varnarmanninn, en Rüdiger á að hafa „misst stjórn á sér“ og slegið liðsfélaga sinn eftir 1-1 jafntefli gegn Real Betis fyrir tveimur vikum.

Atvikið á að hafa átt sér stað á æfingasvæðinu og þurfti að skilja leikmennina að. Í kjölfarið hafa einnig vaknað spurningar um framlag Carreras hjá liðinu.

Carreras, sem er 23 ára gamall og hefur áður verið á mála hjá Manchester United og Benfica, sendi frá sér yfirlýsingu þar sem hann reyndi að slá á málið.

„Undanfarið hafa komið fram fullyrðingar sem endurspegla ekki raunveruleikann. Skuldbinding mín við félagið hefur verið algjör frá fyrsta degi,“ sagði hann og bætti við að atvikið hefði verið „einangrað og þegar leyst“.

Samkvæmt The Athletic bað Rüdiger liðsfélaga sína afsökunar og bauð leikmönnum og fjölskyldum þeirra út að borða til að bæta fyrir hegðun sína.

Þetta er enn eitt vandamálið á erfiðu tímabili Real Madrid, þar sem einnig hefur Kylian Mbappé verið gagnrýndur og sagður hafa lent í rifrildi við starfsmann þjálfarateymisins.