Gabríel Snær Gunnarsson hefur verið seldur frá ÍA til Elfsborg í Svíþjóð.

Gabríel er aðeins 17 ára gamall en kom þó nokkuð við sögu með meistaraflokki ÍA á síðustu leiktíð. Þá kom hann inn á sem varamaður í fyrsta leik liðsins í Bestu deildinni þetta árið gegn Fram á dögunum.

Mun Gabríel spila áfram með ÍA þar til skipti hans til Elfsborg taka gildi í júlí.

Tilkynning ÍA
Knattspyrnufélag ÍA og sænska úrvalsdeildarfélagið IF Elfsborg hafa komist að samkomulagi um félagaskipti Gabríels Snæs Gunnarssonar (f. 2008) frá ÍA til Elfsborgar. Gabríel mun ganga til liðs við sænska félagið 1. júlí næstkomandi en leika með liði ÍA í Bestu deildinni fram að því.

Þetta eru afar gleðileg tíðindi fyrir bæði félagið og Gabríel Snæ, sem fær nú tækifæri til að stíga næstu skref á ferli sínum. Um leið er þetta mikil viðurkenning fyrir starf félagsins, en með þessum félagaskiptum verður Gabríel 13. leikmaðurinn sem ÍA selur erlendis á síðustu níu árum.

Félagið mun njóta þess að sjá Gabríel í síðustu leikjum sínum fyrir ÍA í sumar áður en hann heldur utan í júlí.