Arsenal hefur orðið fyrir enn einu áfallinu vegna meiðsla eftir að Noni Madueke meiddist í leik gegn Sporting CP í Meistaradeild Evrópu.

Madueke lenti í harkalegu samstuði við Pedro Gonçalves í síðari leik liðanna í átta liða úrslitum. Hann lá eftir í kjölfarið og varð ljóst að hann gæti ekki haldið leik áfram. Kantmaðurinn fór af velli um miðjan síðari hálfleik og hélt síðan inn í klefa til frekari skoðunar.

Arsenal gerði markalaust jafntefli í leiknum en fór áfram í einvíginu 1-0 samanlagt.

Óljóst er hvers eðlis meiðslin eru, en talið er að höggið hafi lent á miðjum bol hans. Þetta er ekki í fyrsta sinn á stuttum tíma sem Madueke meiðist, en hann þurfti einnig að fara af velli í landsleik með Englandi nýverið eftir árekstur.

Ungstirnið Max Dowman kom inn á í stað Madueke og gæti fengið stærra hlutverk ef meiðslin reynast alvarleg.

Fjarvera hans myndi bæta við meiðslavandræði Arsenal, en Bukayo Saka, Martin Odegaard, Jurrien Timber og Riccardo Calafiori eru einnig frá vegna meiðsla.