Frankfurt mun ekki selja framherjann eftirsótta Hugo Ekitike nema einhver gangi að verðmiða hans.
Þetta segir Markus Krosche, yfirmaður knattspyrnumála hjá Frankfurt, en Ekitike hefur til að mynda verið orðaður við Chelsea undanfarið.
„Ef enginn greiðir uppsett verð verður hann bara áfram. Við þurfum ekki að selja hann,“ segir Krosche, en talið er að verðmiðinn sé um 85 milljónir punda.
Ekitike átti ansi gott tímabil með Frankfurt. Hann kom frá PSG í fyrra og skrifaði undir fimm ára samning. Þýska félaginu liggur því ekki á að selja.
