Stjórn Þórs/KA hefur komist að samkomulagi við þýska knattspyrnufélagið 1. FC Köln, sem leikur í Bundesligunni, efstu deild þar í landi, um félagaskipti Söndru Maríu Jessen til þýska liðsins.
Sandra hefur verið jafn besti leikmaður Bestu deildar kvenna síðustu ár en heldur nú aftur út í atvinnumennsku.
Sandra lék með Bayer Leverkusen í Þýskalandi áður en hún kom heim í uppeldisfélagið.
„Sandra María hefur því spilað sinn síðasta leik fyrir Þór/KA í bili og færir félagið henni hér með bestu þakkir fyrir ómetanlegt framlag til liðsins, félagsins og knattspyrnunnar á Akureyri,“ segir á vef Þór/KA.
Ljóst er að salan á Söndru er mikil blóðtaka fyrir Þór/KA.
