Bruno Fernandes, fyrirliði Manchester United, fór í áhugavert og hreinskilið viðtal eftir 2-2 jafntefli gegn Everton í æfingaleik vestan hafs í nótt.
„Þetta var ekki okkar besta frammistaða og við vorum frekar latir í dag. Við þurfum að forðast slíkt. Við erum að bæta okkur en erum ekki á þeim stað sem við viljum vera á,“ sagði Porgúgalinn.
United átti skelfilegt tímabil í fyrra og hafnaði í 15. sæti ensku úrvalsdeildarinnar. Fernandes segir að styrkja þurfi leikmannahópinn betur en að hann átti sig á erfiðri stöðu fjárhagslega.
„Mig langar ekki að taka neinn fyrir og félagið er að gera sitt besta miðað við fjárhagslegu stöðuna. En það er alveg ljóst að það þarf meiri samkeppni fyrir leikmennina sem eru hér, meiri gæði til að ýta öllum öðrum upp á hærra plan. Vonandi koma 1-2 leikmenn í viðbót.“
United hefur fengið til sín þá Bryan Mbuemo, Matheus Cunha og Diego Leon í sumar. Var Ruben Amorim, stjóri United, spurður út í ummæli Fernandes.
„Það er gott að leikmönnum finnist þetta. Það þýðir að þeir skilji stöðuna, sem er jákvætt,“ sagði hann.
