Virgil van Dijk, fyrirliði Liverpool, segir að Trent Alexander-Arnold hafi allt eins búist við því að einhverjir stuðningsmenn Liverpool myndu taka harkalega á honum eftir að hann tilkynnti um ákvörðun sína að fara annað.
Samningur Trent við Liverpool rennur út í sumar og fer þessi uppaldi leikmaður þá annað, að öllum líkindum til Real Madrid þó svo að ekkert sé staðfest í þeim efnum.
Fjöldi stuðningsmanna Liverpool baulaði á Trent í 2-2 jafnteflinu gegn Arsenal í gær og var Van Dijk spurður út í þetta eftir leik.
„Stuðningsmennirnir brugðust svona við og hann þarf að sætta sig við það, sem og við hinir. Ég held að hann hafi jafnvel búist við þessu. Það eru tveir leikir eftir og svo fer hann eitthvert annað,“ sagði hann.
„Við erum til staðar fyrir hann og erum svo leiðir yfir að hann sé að fara því hann er frábær leikmaður, við höfum séð það undanfarin ár. Við munum sakna hans sárt.“
