Liverpool goðsögnin og nú sparkspekingurinn Jamie Carragher er að vonum svekktur með að Trent Alexander-Arnold sé að yfirgefa félagið í sumar.
Trent er að fara frítt til Real Madrid, en samningur hans á Anfield er að renna út. Hefur hann verið orðaður við spænska stórveldið lengi en nú virðist samkomulag svo gott sem vera í höfn.
Það er óhætt að segja að stuðningsmenn Liverpool um heim allan séu margir hverjir ósáttir við ákvörðun bakvarðarins.
„Fólk er ekki reitt út af einhverju einu. Það er af því hann fór frítt eða að hann hefði átt að segja félaginu fyrr. Ég er honum ekki reiður fyrir að fara frítt. Í fullkomnum heimi fengi Liverpool 70-80 milljónir til að nota en þú færð ekki allt. Við myndum líka fagna því að fá leikmann frítt í sumar,“ segir Carragher.
„Ég er aðallega svekktur að honum finnist það ekki málið að vera hér. Hann er uppalinn og í liði sem getur keppt um deildina og Meistaradeildina á hverju ári. Ég myndi vilja taka 7-8 ár í viðbót í hans stöðu.“
