Graeme Souness, goðsögn Liverpool, hefur nafngreint einn leikmann Chelsea sem hann er alls ekki hrifinn af í dag.

Um er að ræða Enzo Fernandez, miðjumann Chelsea, sem hefur ekki staðist væntingar eftir komu frá Benfica í Portúgal.

Enzo er búinn að missa byrjunarliðssæti sitt hjá Chelsea og virðist ekki vera aðalmaðurinn hjá Enzo Maresca, stjóra liðsins.

Souness telur að Chelsea sé með fínan hóp en að það þurfi að setja spurningamerki við ákveðin kaup félagsins undanfarin tvö ár.

,,Það er enn of snemmt að dæma Chelsea. Með þennan hóp eiga þeir möguleika á að ná topp fjórum en þeir eru enn nokkuð frá því að vinna deildina eða Meistaradeildina,“ sagði Souness.

,,Ef ég horfi á núverandi hópinn þá er gríðarleg sóun þarna inni á milli. Augljósasta dæmið er einhver sem er ekki einu sinni í byrjunarliðinu í dag.“

,,Enzo Fernandez, þeir keyptu hann á 105 milljónir punda. Þeir hafa fengið inn fjölmarga leikmenn og ákveðnir leikmenn eru ekki að standast væntingar.“