Albert Guðmundsson framherji Fiorentina á Ítalíu og íslenska landsliðsins er væntanlegur til landsins og verður við aðalmeðferð í máli gegn sér á fimmtudag. Vísir.is segir frá.

Albert er sakaður um að hafa brotið kynferðislega á konu hér á landi fyrir rúmu ári síðan.

Samkvæmt heimildum Vísis mun aðalmeferð málsins taka tvo daga og segir að mörg vitni verði kölluð fyrir dóminn. Réttarhöldin eru lokuð almenningi.

Sérstaka athygli vekur að málið er hvergi að finna í auglýstri dagskrá dómstólsins sem er afar óvenjulegt.

Ung kona kærði Albert til lögreglu fyrir kynferðisbrot sumarið 2023. Eftir að rannsókn lögreglu lauk var málið sent til héraðssaksóknara. Í febrúar á þessu ári ákvað héraðssaksóknari að fella málið niður. Sú ákvörðun var kærð til ríkissaksóknara sem felldi hana úr gildi og lagði fyrir héraðssaksóknara að ákæra í málinu.

Albert hefur neitað sök í málinu en á meðan málið er í ferli banna reglur KSÍ honum að spila fyrir íslenska landsliðið.

Albert gekk í raðir Fiorentina í sumar á láni frá Genoa en Fiorentina getur keypt Albert næsta sumar og er talið að það muni á endanum ganga í gegn.