Gylfi Þór Sigurðsson var skælbrosandi í kvöld eftir leik Vals og ÍA í Bestu deild karla en um var að ræða fyrstu umferð.

Gylfi skoraði annað mark Vals í þessum leik en Patrick Pedersen skoraði það fyrra og er nú kominn með 100 mörk í efstu deild.

Gylfi ræddi við Stöð 2 Sport eftir lokaflautið í kvöld og virkaði virkilega ánægður með sigurinn og lífið hér heima.

,,Þetta var erfitt, mér fannst við vera betri aðilinn í leiknum en þegar staðan er 1-0 undir lokin eða 2-0, ÍA er alltaf inni í leiknum ef þeir skora en þetta er örugglega fínt miðað við fyrsta leik,“ sagði Gylfi.

,,Það er erfitt að meta síðasta leik bæði fyrir okkur og Víkinga, það var það kalt og völlurinn.. Það var erfitt að spila gegn Víkingum.“

,,Formið er fínt, ég er smá frá sharpness, það vantar 2-3 leiki í viðbót en við tökum þessu rólegu fyrstu leikina, vonandi bætum við rólega 10-15 í hverjum leik.“

,,Ég er ánægður með að hafa skorað og það er gott fyrir striker að fá mörk, við munum þurfa hann í sumar en það var frábært fyrir mig að ná inn mínu fyrsta marki.“

,,Það er aðallega kuldinn sem er vesen  en gervigrasið er fínt og hópurinn er frábær, ég er mjög ánægður.“