Jóhann Berg Guðmundsson landsliðsfyrirliði var fjarverandi í leiknum gegn Ísrael á dögunum vegna meiðsla. Jóhann Skúli Jónsson sagði í Dr. Football að það hafi kannski ekki verið alslæmt en ekki eru allir á sama máli.

Ísland vann Ísrael 4-1 og er komið í úrslitaleik við Úkraínu um sæti á EM. Ekki er ljóst hvort Jóhann Berg nái þeim leik.

„Við erum með alla þessa leikmenn. Kristian Nökkvi snertir til dæmis ekki grasið. Þetta var smá þannig að Jói Berg yrði að vera þarna og Age (Hareide landsliðsþjálfari) neitar að spila honum annars staðar en á miðjunni. Ef Jói Berg hefði verið með á miðjunni hefðum við verið með á bekknum byrjunarliðsmann í Ajax (Kristian Nökkva) og núna byrjunarliðsmann í Lille (Hákon Arnar Haraldsson). Þetta er gott dæmi um að hæfileikarnir okkar komast ekki allir inn á völlinn,“ sagði Jóhann í Dr. Football.

Þetta var tekið fyrir í hlaðvarpsútgáfu af Íþróttavikunni á 433.is og þar gaf Hörður Snævar Jónsson lítið fyrir þetta.

„Það var svolítið skondið að hlusta á Jóhann Skúla, afleysingakennara Hjörvars Hafliðasonar í Dr. Football, reyna að telja fólki trú um það að það hafi verið blessun í dulargervi að Jói hefði meiðst, það hefði bara hjálpað liðinu.

Maður skellti eiginlega upp úr og hristi hausinn á sama tíma þegar maður hlustaði á þá vitleysu. Ég veit ekki alveg á hvaða vegferð Valsarinn geðþekki er á þar,“ sagði Hörður og benti á reynsluna í Jóhanni Berg.

„90 landsleikir, eini leikmaðurinn í hópnum sem er að spila í erfiðustu deild í heimi. Þannig maður skellti upp úr.“