Age Hareide, þjálfari íslenska karlalandsliðsins, var að vonum himinnlifandi með 1-0 sigur á Bosníu-Hersegóvínu í kvöld.

Liðin mættust í undankeppni EM 2024 og skoraði Alfreð Finnbogason sigurmarkið í blálokin.

„Það er alltaf gott að sigra. Það er það sem fótboltinn snýst um,“ sagði Hareide á blaðamannafundi eftir leik.

Íslenska liðið hefur verið í brekku í undankeppninni hingað til og tapaði gegn Lúxemborg fyrir helgi.

„Við gátum lifað með töpunum gegn Slóvakíu og Portúgal því frammistaðan var allt í lagi en frammistaðan gegn Lúxemborg var ekki í lagi. Það var erfitt fyrir mig, starfsfólkið og liðið.“

Hareide segir sigurinn í kvöld hafa verið verðskuldaðan.

„Við áttum þetta skilið að mínu mati því við fengum mikið af tækifærum og klúðruðum nokkrum dauðafærum. Þetta minnti mig smá á leikinn gegn Slóvakíu en við skoruðum að lokum.“

Norski þjálfarinn segir sigurinn í kvöld þýðingarmikinn fyrir alla.

„Það gefur öllum sjálfstraust og spark í rassinn að vinna og við getum byggt á því. Við vorum nálægt því að ná árangri í júní og nú þurfum við bara að halda áfram.

Landsliðið skiptir íslensku þjóðina miklu máli. Ég elska ástríðuna sem þjóðin sýnir. Fótbolti snýst um tilfinningar og það voru allir fegnir því ég held að allir vilji að við stöndum okkur vel.“