Zlatan Ibrahimovic hefur lagt skóna á hilluna. Þetta tilkynnti hann eftir leik AC Milan gegn Verona í gær. Það virðist sem svo að hann muni snúa aftur til Milan í einhverri mynd.
„Það eru svo margar minningar á þessum leikvangi. Þegar ég kom fyrst færðuð þið mér hamingju. Þegar ég kom í annað sinn færðuð þið mér ást. Ég vil þakka fjölskyldunni og þeim sem eru nánir mér fyrir að sýna mikla þolinmæði. Ég vil þakka hinni fjölskyldunni, leikmönnum, þjálfurum og starsfmönnum fyrir ábyrgðina sem þið færðuð mér. Ég vil þakka stjórnarmönnum fyrir tækifærið sem þið gáfuð mér,“ sagði Zlatan eftir leikinn í gær.
Hann þakkaði stuðningsmönnum svo innilega.
„Síðast en ekki síst vil ég þakka stuðningsmönnunum. Þið tókuð á móti mér með opnum örðum og ég verð stuðningsmaður Milan að eilífu. Þða er kominn tími til að kveðja fótboltann, en ekki ykkur. Það er of mikið af tilfinningum. Ef þið eruð heppin sjáið þið mig. Áfram Milan, bless.“
Enskir miðlar velta upp ummælum Zlatan í restina. Vilja þeir meina að kappinn hafi gefið í skyn að hann gæti orðið þjálfari hjá Milan eða jafnvel tekið að sér annars konar starf. Hvernig sem því líður er allavega útlit fyrir að hann snúi aftur sem stuðningsmaður á pöllunum.
Zlatan átti stórkostlegan feril. Hann skoraði 511 mörk í félagsliðaboltanum fyrir Malmö, Ajax, Juventus, Barcelona, Inter, PSG, Man United, LA Galaxy og Milan.
Þá skoraði framherjinn stóri og stæðilegi 62 mörk í 122 A-landsleikjum fyrir Svíþjóð.
