Það greip um sig skelfing á fótboltaleik í El Salvador aðfaranótt sunnudags.

Þá mættust Alianza og FAS. Leik var hins vegar hætt eftir aðeins 16 mínútur.

Leikurinn fór fram á velli sem tekur tæplega 45 þúsund manns í sæti. Það voru hins vegar mun fleiri mættir en það og hætta skapaðist.

Í gær var greint frá því að minnst tólf væru látnir og um 500 slasaðir eftir troðning sem myndaðist á áhorfendapöllum.

Allir sem gátu vettlingi valdið, þar á meðal leikmenn liðanna, reyndu að koma mannskapnum til bjargar.

Talið er að fjöldi manns hafi komist inn á fölsuðum miðum. Því hafi troðningurinn myndast.

Hér að neðan má sjá myndir frá hörmungunum, sem réttast er að vara við.