Hamarinn, húskerfi Þórsara, náði 13 réttum á blönduðum getraunaseðli með landsleikjum og leikjum í neðri deildum á Englandi á laugardaginn. Það stefndi reyndar lengi vel í að húskerfið fengi aðeins 12 rétta. Tíu leikjum var lokið á seðlinum og þrír landsleikir í gangi, Spánn-Noregur, Króatía-Wales og Andorra-Rúmenía. Treyst var á sigur Spánverja og Rúmena og fljótlega ljóst að það gengi eftir.

Í kerfinu var hins vegar gert ráð fyrir að Wales myndi mögulega ná jafntefli við Króatíu, eða að Krótatar myndu sigra, sem sagt gert ráð fyrir 1x á þeim leik. Króatar komust yfir og allt leit út fyrir sigur þeirra þar til í uppbótartíma þegar Nathan Broadhead, leikmaður Ipswich Town sem spilar í þriðju efstu deild á Englandi (League One), skoraði jöfnunarmark á þriðju mínútu viðbótartíma leiksins. Broadhead hafði í sínum öðrum landsleik komið inn á sem varamaður á 66. mínútu, skoraði jöfnunarmarkið og varð til þess að húskerfið – Hamarinn – fékk 13 rétta, en ekki 12. Sparnaðarkerfið virkaði nefnilega þannig að miðað við úrslit í öðrum leikjum hefði ekki dugað að fá 1 á þennan leik – jafnteflið var það sem þurfti. Upplýsingar um leik Króatíu og Wales má t.d. sjá á sofascore.com.

Vinningsupphæðin varð tæplega 800 þúsund krónur samanlagt. Vinningsupphæðin fyrir 13 rétta var um 730 þúsund krónur, en getraunakerfi Hamarsins gaf einnig þrjár raðir með 12 réttum, 12 raðir með 11 réttum og 64 raðir með tíu réttum. Hluthafar í húskerfinu kaupa ýmist einn eða tvo hluti, en hluturinn kostar 500 krónur. Upphæðin sem um ræðir skiptist því á nokkra hluthafa. Upplýsingar um getraunaþjónustuna hjá Þór og hvernig hægt er að taka þátt í húskerfinu má finna hér: